2027ലെ ഒന്നും രണ്ടും വർഷ ഹയർ സെക്കൻഡറി പൊതുപരീക്ഷ മാർച്ച് രണ്ടിന് ആരംഭിച്ച് മാർച്ച് 30ന് അവസാനിക്കും. വൊക്കേഷണൽ ഹയർ സെക്കൻഡറി, കേരള കലാമണ്ഡലം പൊതുപരീക്ഷകളും ഇതേ കാലയളവിൽ നടക്കുമെന്ന് പൊതുവിദ്യാഭ്യാസ വകുപ്പ് മന്ത്രി എൻ ഷംസുദ്ദീൻ തിരുവനന്തപുരത്ത് വാർത്താസമ്മേളനത്തിൽ അറിയിച്ചു. മാർച്ച് 12, മാർച്ച് 30 തീയതികളിൽ ഉച്ചയ്ക്ക് 2 മണിക്കും മറ്റു ദിവസങ്ങളിൽ രാവിലെ 9.30നുമാണ് പരീക്ഷ തുടങ്ങുക.
ഹയർ സെക്കൻഡറി പരീക്ഷ ഏകദേശം 9 ലക്ഷം വിദ്യാർത്ഥികളാണ് എഴുതുന്നത്. കേരളം, ഗൾഫ്, ലക്ഷദ്വീപ് എന്നിവിടങ്ങളിലായി 2000ത്തോളം പരീക്ഷാകേന്ദ്രങ്ങൾ സജ്ജമാക്കും. വൊക്കേഷണൽ ഹയർ സെക്കൻഡറി ഒന്നും രണ്ടും വർഷ പരീക്ഷ ഏകദേശം 53,000 വിദ്യാർത്ഥികൾ 389 കേന്ദ്രങ്ങളിലായി എഴുതും.
പ്രായോഗിക, മാതൃകാ പരീക്ഷകൾ
രണ്ടാം വർഷ ഹയർ സെക്കൻഡറി വിദ്യാർത്ഥികളുടെ പ്രായോഗിക പരീക്ഷകൾ 2027 ജനുവരി 25ന് ആരംഭിക്കും. രണ്ടാം വർഷ വൊക്കേഷണൽ ഹയർ സെക്കൻഡറി വിദ്യാർത്ഥികളുടെ വൊക്കേഷണൽ വിഷയങ്ങളുടെ പ്രായോഗിക പരീക്ഷ ജനുവരി 15ന് തുടങ്ങും. പൊതുപരീക്ഷയ്ക്ക് മുന്നോടിയായുള്ള മാതൃകാ പരീക്ഷകൾ 2027 ഫെബ്രുവരി 11 മുതൽ 24 വരെ നടക്കും.
മൂല്യനിർണയം 2027 ഏപ്രിൽ 5ന് ആരംഭിക്കും. മെയ് 15 ഓടെ ഫലം പ്രഖ്യാപിക്കാനാകുമെന്നാണ് പ്രതീക്ഷ. രണ്ടാം പാദവാർഷിക പരീക്ഷ (ക്രിസ്തുമസ് പരീക്ഷ) ഡിസംബർ 8 മുതൽ 17 വരെ നടത്തുമെന്നും മന്ത്രി അറിയിച്ചു.
ഫീസ് അടയ്ക്കേണ്ട തീയതികൾ
ഫൈൻ ഇല്ലാതെ ഫീസ് അടയ്ക്കാനുള്ള അവസാന തീയതി നവംബർ 23. 20 രൂപ ഫൈനോടെ നവംബർ 25 വരെയും, 20 രൂപ ഫൈനിന് പുറമെ ഓരോ ദിവസത്തിനും 5 രൂപ വീതം ഫൈനോടെ നവംബർ 27 വരെയും അടയ്ക്കാം. 600 രൂപ സൂപ്പർ ഫൈനോടെ ഫീസ് അടയ്ക്കാനുള്ള അവസാന തീയതി ഡിസംബർ 2 ആണ്.
അവലംബം: PRD Live (Kerala Govt) · ചിത്രം: PRD Kerala
